政情：肥媽參選葉劉當睇騷
近日傳出人稱「肥媽」嘅Maria Cordero，喺立法會議員林大輝幕後發功下，決定循新界東參加立法會五區補選，挑戰辭咗職嘅社民連長毛梁國雄。肥媽尋日承認考慮緊參選一事，仲話參選與否要先過家人嗰關，不過佢表明唔認同五區「公投」，認為爭取普選要循序漸進，正所謂「熱飯唔能夠熱食」，既然有議席出缺，咪考慮參選囉！
聞說肥媽背後，係沙田區委任區議員、創辦沙田林大輝中學嘅大輝喺幕後發功。人在北京開兩會嘅全國政協委員大輝聽到傳聞後矢口否認，強調絕無其事，話自己根本唔係新界東選民，若然肥媽真係參選，佢都會睇睇各參選人嘅政綱，先決定支唔支持喎。
繼白姐姐白韻琴有意出選九龍西後，肥媽係第二位有意參選嘅娛樂圈相關人士。尋日有人提議立法會議員葉劉淑儀叫校友兼電視節目主持人蘇施黃參選埋一份，葉太冷淡話儘管試吓，但佢相信搵緊真銀嘅阿蘇對做議員興趣唔大囉！講到肥媽有意參選，葉太都忍唔住口話，依家好似出嚟選嘅都係娛樂圈中人，索性將補選當成娛樂節目！