政情：林D9龜步台港路漫漫
港府弱雞，對台政策瞻前顧後，膽怯腳軟，以前聽人鬧得多，尋日終於大開眼界。政制及內地事務局局長林瑞麟（林D9）同商務及經濟發展局局長劉吳惠蘭（Rita）聯袂率團訪台三日，參訪行程同去年底海協會會長陳雲林訪問台中大同小異，但在台行動如履薄冰，幾乎大部分行程都唔對外開放，呢種對台政策嘅保守謹慎作風，聽聞令台灣接待人員都大為驚訝，高呼大開眼界！
九七前後，「台灣」一向係港府禁地，馬英九○八年上台做總統後，時移勢易，隨着兩岸關係逐漸升溫，港府亦唔執輸，舊年四月先有民政事務局局長曾德成以第二屆佛教論壇港澳代表團名譽團長名義訪台，後來林D9仲成為港府首個以官方身份踏足台灣嘅「破冰」官員。不過，港府有姿勢，無實際，一直被人批評台港關係發展如龜步蟻行，比起中央政府同台灣嘅步伐更慢，落後大勢，今次林D9帶住Rita重遊寶島，就為呢個批評留下有力註腳。
關係發展比兩岸慢
舊年十二月，海協同海基會喺台中進行第四度會議，台中市市長胡志強以地主身份邀請陳雲林參訪台中市政建設，好似七期重劃區咁，又暢遊日月潭。林D9同Rita今次行程節目幾乎倒模照抄，尋日登台中最高嘅亞緻飯店頂樓，鳥瞰台中；今日赴日月潭，聽日參觀台中七期重劃區建設。
行程幾無二致，不過港府高官嘅表現，就小心謹慎得多。陳雲林參訪台中，唔止開放記者採訪，即使因場地限制，亦由記者推派代表拍攝，再統一供稿。反觀林D9同Rita，除咗喺機場、飯店接受記者採訪同發表談話等少數行程公開，其餘行程幾乎全部「密封」，唔對外開放，記者幾經協調，先至同意隨行在旁拍攝，但亦唔接受採訪。林D9同Rita以咁保守謹慎嘅官僚作風訪台，台港關係發展行得慢過兩岸關係，有乜咁出奇呢？
對香港代表團唔肯公開行程畀傳媒採訪，台灣官員以尊重香港方面為由，唔表示意見，而香港工作人員則解釋，指行程未定，需視台中市政府安排確定，先至能對外公開喎。不過，台灣方面嘅接待人員就向記者爆料，話呢啲行程陳雲林好多都走過，當時並無排斥媒體拍攝，對港府官員態度如此保守謹慎，惟有講句：大開眼界！