中環出更：名人揀香水各有所好
香水，是女士及男士不可或缺嘅恩物，連莎莎集團主席郭少明都話要向香水致敬，尋日舉行首屆香水奧斯卡頒獎禮。名人齊分享做「香香公主」或「香味王子」心得。
玩具大王蔡志明千金蔡加怡愛Issey Miyake夠清新；富豪集團太子女羅寶文迷上Blumarine嘅香氣，九巴董事雷禮權（William）鍾意Jean Paul Gaultier嘅香水夠個性，總之各有所好。
置身香水頒獎禮，卓妮都被迷魂得一陣陣。蔡加怡身穿Lanvin飄逸新裝進場，原來佢愛用Issey Miyake，清新香味令伊人愛足六年，縱使坊間香水琳瑯滿目都未變心。
雷禮權直接噴頭髮
羅寶文就花心啲，聞到海洋味香水就心花怒放，心水係Blumarine或者Body Shop香水，卓妮問佢約會男友時會否轉吓香味予對方驚喜，寶文甜笑話，希望男友鍾意嗰個係佢，唔係啲香水喎。
搽香水唔再係女人專利，William都有噴香水嘅習慣，兩年前獲鬼才設計師Jean Paul Gaultier送贈一支香水後一聞傾心，鍾情至今。William噴香水有妙法，不揀耳後或腋下，而係直接噴落頭髮，香氣足夠陶醉一整日。
數城中的「香水教主」，非郭少明莫屬。佢自爆噴香水天天新款，皆因公司經營化妝品生意，每月至少有三、四百種新香水任試唔嬲，噴香水都噴到手軟。
卓妮