中環出更：陳瑞球趣談閱歷引爆笑彈
城市大學喺上個財政年度慘蝕七億二千幾萬，要加大力度撲水，最近就搞咗個《成功導航計劃》籌款活動，邀請一班企業家錄製短片，與學生分享成功之道及人生智慧。著名慈善家長江製衣董事長陳瑞球、協成行董事總經理方潤華等人尋日親自出席短片首播禮，當中以球伯講嘢最風趣又中正要害。
球伯喺短片中話：「做人有夢想、有目標係啱，但要逐步逐步……小事唔理變大事，大事唔理變出事」，藉此勸勉後生仔要面對困難，及時解決問題，話音未落，全場爆笑。合和實業主席胡應湘就話，一個人成功與否有好多因素，而且每個人悟性和努力都唔同，但最重要對周圍事物有好強嘅觀察力。
楊貫一虎父無犬女
今次有九位成功人士分享人生經驗，富臨飯店創辦人「阿一鮑魚」楊貫一係其中之一，佢臨時抱恙未能出席，由愛女楊慕琴（Cecilia）代父出征，但喺短片亦睇到一哥做人嘅座右銘。一哥話，做人做事都要中肯和有信譽，仲要做到「人無我有，人有我優，人優我更優」，唔怪得一哥至今仍然可以屹立不倒啦！
講番一哥愛女Cecilia，大家可能唔多認識，但佢來頭不小，係全球著名快遞公司TNT集團華南區總經理，喺廣州返工。Cecilia話，自細喺父親身上都學到好多嘢，包括勤奮、投入及專注，而且待人以誠，唔怕蝕底，對佢影響好大。
城大校長郭位為第一輯《成功人士系列》成功推出感到高興，話依家社會錢財充斥，物慾橫流，短片可以激勵學生，學習無私嘅奉獻精神，佢現正積極籌備第二輯短片，或者郭位都可以客串分享吓。
卓妮