個人私隱專員吳斌今年七月尾任期就屆滿，佢任期內好似只得一個任務，就係要求擴權同增撥資源，當然仲有嘥錢。佢心知政府唔會畀佢續任，所以前日搶閘發聲明話自己唔考慮續任，而政府亦少有地反應快，尋日表明態度唔挽留，仲話會喺短期內公開招聘私隱專員。
任期五年、呻足五年嘅吳斌尋日向傳媒承認自己咁早表明無意續任係要先發制人，不過佢話自己上任時已經諗好一到期就走人，而且舊年仲做咗份工作報告交代「身後事」。
不過，吳斌尋日依然不遺餘力狂數政府孤寒罪狀，佢卸責話：「我唔夠米煮飯惟有煲粥囉！」之後仲寸爆政制及內地事務局局長林瑞麟要上到立法會先肯應承加資源：「我厭惡呢啲生活，見到人就呻窮。」吳斌尋日不忘「提醒」林瑞麟要盡快搵繼任人，而下任專員最好同佢一樣有法律背景喎。如果繼任人係佢嘅翻版，就真係不幸囉。