政情：青聯「愛家日」多贊助
今年四月香港青聯活動多籮籮。主席陳仲尼（Rock）話，佢哋班青聯姊妹組成嘅青聯賢慧社，四月九日會搞個「愛家日」，帶觀塘區二百五十個低收入家庭小朋友同埋佢哋嘅家長，去海洋公園玩番日。至於同月廿九日就係青聯一年一度招聘會，舊年阿Rock做搞手，幫二千幾個大學生搵工；今年朱鼎健（Ken）接手做召集人，以Ken嘅人面、加埋青聯兄弟姊妹嘅努力，相信可以再創佳績。
講開阿Ken，去年聖誕節佢做聖誕老人，捐咗六萬八蚊畀賢慧社，支持呢個海洋公園活動，不過賢慧社召集人、港協暨奧委會秘書長彭沖嘅囡囡彭芷君話，呢筆錢仲未使動用，事關個活動有好多人支持，好似扮嘢文包起入場券，四洲集團太子女戴凱欣送零食，仲有龍昌贊助玩具，所以基本上佢哋呢個活動都唔使點用錢。芷君仲話，佢哋成班姊妹個個賢慧，最叻知慳識儉，所以家下賢慧社有成十幾萬儲備。除咗物資之外，芷君話到時扮嘢文同醫管局主席胡定旭、仲有政府高官都會嚟主禮，認真畀面！