政情：鄧蓮如同甜糖撐枱腳
中環香港會可謂名人飯堂，唔少高官名人都會嚟呢度撐枱腳，不過，好似前行政局首席議員鄧蓮如（Lydia）勳爵同廉政專員湯顯明呢個配搭，就比較特別，原來Lydia尋日去咗廉署大樓參觀，之後同湯顯明順道一齊食飯。
原來鄧蓮如喺回歸前曾經做過廉署投訴事宜委員會主席，同廉署淵源深厚，曾經就廉署人員嘅操守同誠信問題提供過唔少嘅意見。
Lydia雖然長居英國，但係不時都會返香港開吓會同見吓朋友，佢喺啱啱過咗去嘅星期日至喺香港慶祝完七十歲生日，尋日就去咗北角廉署大樓參觀，仲大讚香港今日咁成功，全靠有良好法治同廉署嘅努力咁話。
綽號「甜糖」嘅湯顯明認真識做，唔單只同Lydia去香港會食飯撐枱腳，仲幫對方開埋車門，果然有紳士風度，而Lydia亦打扮得一絲不苟，睇起嚟仲後生過年過六十嘅甜糖添。