政情：白鴿三子豪遊埃塞俄比亞
大家一提起東非國家埃塞俄比亞，都會諗起啲餓到皮包骨嘅悲慘饑民，但向來識玩識歎嘅白鴿黨立法會議員張文光夫婦，上個月就帶住黨友李永達同甘乃威一家去當地旅遊，仲玩得超豪超浪漫，各位捨得花錢嘅讀者，不妨參考吓呢個超豪旅程。
張文同我哋講，埃塞俄比亞除咗以內戰同饑荒聞名之外，該國宗教、文化同歷史建築亦好出名同有特色，好似佢哋到訪過嘅一組教堂，就係喺一整舊岩石中間鑿出嚟，目的係防禦古時入侵嘅伊斯蘭教徒，令佢哋大開眼界。
為睇歐聯在所不惜
一行人喺二月十四日晚、即係大年初一去咗埃國一個好偏遠嘅地方，當地冇花舖又冇糖果店，即使有錢都好難豪過情人節，但張文一早安排喺埃國首都空運啲玫瑰花、朱古力同紅酒畀佢哋，高達同甘威嘅太太讚到張文天上有地下無，大嘆自己個老公唔夠細心同浪漫。
眾所周知，張文同高達都係紅魔鬼曼聯嘅忠實粉絲，今次旅程撞正曼聯對AC米蘭嘅歐聯世紀大戰，兩人點算好呢？唔使驚，張文早喺出發前已同當地酒店講明，使幾多錢都唔可以錯過呢場波，最後酒店喺大堂裝個超級大螢幕直播該場賽事，真係要幾豪有幾豪。至於最後每人到底使咗幾多錢呢，張文就話唔好提喇！