政情：八萬五魔咒死纏煲呔曾

預算案提出嘅四招穩定樓市措施，被各界批評無心無力，財政司司長鬍鬚曾日前出席電台節目時，就多次借九八年金融風暴後出現嘅負資產問題恐嚇市民，但都唔敢直接提及當年冧市元兇八萬五政策。不過煲呔曾上星期四喺禮賓府閉門會見專業會議四名議員時，就打破禁忌重提八萬五。

據了解，專業會議議員梁美芬喺會面中要求政府重推首次置業貸款計劃，強調大部分立法會黨派都支持有關建議，又話早前房委會推出嘅居屋貨尾大受歡迎，話咁快就賣晒，政府好應該諗諗適量重建居屋，解決中基層市民置業難嘅問題。

暗寸議員隨風擺柳

平心而論，梁美芬提出嘅建議都算溫和，不過，據聞煲呔曾當時反應好大，強調政府當年推出首置計劃，主因係八萬五政策推冧咗成個樓市，最後要由當時做財政司司長嘅佢幫手補鑊，用公帑資助市民買樓撐住個市。煲呔曾仲重申，現屆政府無意推冧樓市，又話喺呢個時間重推首置，反而可能令樓市火上加油，製造更多潛在負資產，所以即使有各大黨派支持，佢都一定唔會做。

據聞煲呔曾喺席間又翻舊帳，話當年立法會各黨派一致舉腳支持八萬五政策，其中民主黨李永達仲話八萬五千個單位都唔夠，叫政府起多五千個居屋砌夠齊頭數九萬，但後來金融風暴殺到，香港樓價大跌出現大批負資產，啲政黨就全部掉轉槍頭鬧爆政府，佢至今仍記憶猶新。

其實煲呔曾最憂慮嘅相信唔係推冧樓市，而係擔心好似老董咁盡失民心、做唔足五年任期就被迫腳痛下台。早前佢嘅民望評分跌至不受歡迎水平，即使預算案大灑金錢派糖收買人心，對民望嘅刺激作用亦只能維持幾日，患上八萬五恐懼症都好合理；不過，咁就苦了大批無力上車嘅中基層市民，分分鐘又會激起民怨，睇嚟煲呔曾仲有排冇覺好瞓！