中環出更：Ann蔣着上海灘唐裝玩變身
女士總愛天天新款，年中花唔少錢置新裝。其實只要識得配搭，一樣可以變身做花蝴蝶，好似全國政協委員蔣麗芸（Ann）咁，佢就親身演繹如何將「上海灘」唐裝衫多樣着。
訪京帶定保濕面霜
Ann蔣近年迷上中國look，早前出席友好協進會新春酒會，Ann蔣揀嚟一件橙紅色唐裝上台做司儀，原來件衫係「上海灘」出品，盛惠約三千蚊。佢話早前喺「上海灘」掃咗幾件唐裝，呢款只係其中一件。Ann蔣話，唐裝予人端莊大方感覺，加上款式襟睇，多買幾件都唔怕過時。
Ann蔣仲擅長玩變衣戲法，早兩日上京開兩會時，穿上黑色絲絨唐裝上機。睇真啲，原來件衫同出席協進會嗰件一模一樣，秘密係底面都着得。上京天氣凍，護膚最頭痕，Ann蔣帶定支Estee Lauder Time Zone抗皺保濕面霜，佢話搽咗兩年發覺補水功效一流，出差去凍地方一定帶番支傍身。
卓妮