中環出更：陳振彬南美三國再度蜜月
青年事務委員會主席陳振彬（Bunny）上月放咗個悠長假期，由二月七日放到廿四日，連續十八日橫跨農曆新年，一口氣暢遊南美智利、巴西及阿根廷三國，多年來嘅南美夢終於如願以償。今次旅程所見所聞不但為Bunny帶來深刻體驗和感受，最難得係可以同太太再度蜜月，但就要忍心暫時擺低對寶貝仔喺香港，全程靠視像電話通話免得心掛掛。
智利巴西阿根廷
Bunny首站先到智利嘅首都聖地牙哥及康賽普西翁。Bunny話，聖地牙哥風景只屬一般，但沿海岸線風景好優美，至於康賽普西翁令佢感受至深，眼見當地貧富懸殊嚴重，貧民區多數興建喺山上，感覺好似香港六十年代嘅臨屋區和木屋區。
原本Bunny諗住去當地一啲唐人街參觀見識吓，但被當地導遊以安全為由勸喻唔好去，以保障人身安全。佢哋其後轉到巴西里約熱內盧，遇上每年一度、萬人空巷嘅嘉年華，Bunny同樣因為擔心治安差，加上扒手多，所以只係逗留咗好短時間，所以令佢感受到香港真係一個安居樂業嘅好地方。
Bunny最後一站到阿根廷，最難忘係依瓜蘇瀑布嘅壯觀大自然環境，瀑布長達兩至三公里，佢同太太喺瀑布前留影，風景如畫。Bunny話全個旅程都無買手信，但到阿根廷遊覽時卻被當地嘅歐陸式時裝所吸引，最後都買咗幾套便服及皮鞋。
不過，幾盡興都好，Bunny夫婦始終放不下留港嘅一對囝囝，經常以視像電話同對寶貝仔通話。不過，南美國家長途電話費好乸脷，十幾日旅程佢哋打咗兩萬多元電話費！不過，Bunny坦言從未試過同太太放過咁悠長嘅假期，貴啲都無所謂啦！
卓妮