公社兩黨五區總辭要政府花一億六千萬元公帑補選，原來累街坊不僅如此。日前地政總署向現任立法會議員發出通告，話因為立法會補選，要求佢哋今個月十五日前拆走依家掛喺街嘅宣傳品，以便騰出空間畀參與補選嘅候選人展示競選宣傳，否則當局會幫佢哋拆，但要收番清拆費用。地政總署仲話喺六月一日後，佢哋可以自行將啲宣傳品擺番喺原先嘅地方。
工聯會新界西地區直選議員王國興直指咁做簡直勞民傷財，佢有五百幾塊街板，一拆一排都係錢，每塊由一百至三百元不等，條數真係好襟計。
零售及批發功能組別議員方剛都覺得唔多妥，佢話補選有爭議，有同僚仲話要否決補選經費，但係政府竟然唔聲唔聲就發出拆板通告。佢原本預咗街板一掛就四年，好多都係木製嘅，拆咗落嚟好易爛，亦唔知邊度有咁大嘅地方擺放，所以佢會約見政制及內地事務局局長林瑞麟，要求政府支付拆板費喎！