港產片《歲月神偷》揚威國際，部戲由電影發展基金打本開拍，所以電影發展局主席蘇澤光（Jack So）尋日向傳媒大讚《歲月神偷》夠寫實，趁機為電影發展基金賣廣告，之後佢仲自爆睇電影嘅古怪習慣。
Jack So做得電影發展局主席，必定係一個戲癡，睇戲自然係生活中不可少嘅一部分，但原來佢喺屋企煲碟時成日都會fast forward（快速搜畫），因為佢遇到好戲又冇乜時間慢慢睇，遇到唔好睇嘅又想盡快飛過瞄吓啲畫面就當睇咗，久而久之就養成呢個習慣。
講番《歲月神偷》，Jack So話部戲反映香港六十年代生活，老一輩嘅港人都會感同身受，佢仲好感嘆咁話，香港人以前比較務實，依家反而靠炒股炒樓發達，佢希望港人睇完《歲月神偷》之後會深思，發揮腳踏實地嘅香港精神。