搞爛gag畀人寸

尋日鬍鬚曾出席港大個預算案論壇時，不斷畀班學生質疑，批評預算案冇長遠扶貧措施，又冇增加大學嘅津貼學位。只可惜鬍鬚曾唔係迴避問題，就係一味重複官方答案，而當佢想把握機會認叻，話自己上年取消紅酒稅，成功增加唔少就業機會時，全場嘅燈就忽然熄晒，真係邪到冇人有。鬍鬚曾嘗試搞gag緩和氣氛，問港大係咪冇交電費，點知就畀港大高級名譽研究員、之前有傳同鬍鬚曾不和嘅港府前經濟顧問郭國全反窒，話因為政府冇畀電費津貼大學喎，搞gag反遭人寸爆，鬍鬚曾惟有黯然收聲。

鬍鬚曾之後再走下場，出席青協搞嘅論壇，可能因為席上多數都係中小學生，所以問題都相對輕鬆，只可惜鬍鬚曾仍然難逃被主持寸爆嘅命運。有學生問佢鍾意食咩，鬍鬚曾就一臉尷尬咁話自己鍾意食朱古力，所以好多同事都鍾意去佢間房度開會喎。此話一出，青協主持即刻贈佢一句：「原來你平時都派糖，唔怪得之你咁鍾意派糖啦！」鬍鬚曾當堂無言以對。

中大尋日出咗最新民調，發現有三成一弱勢社群覺得預算案並冇照顧到佢哋，只有二成八人覺得有；而中產就更慘，有四成四人覺得預算案冇料到，得一成八人收貨。除此之外，仲有近六成人認為預算案無助提高佢哋對特區政府嘅管治信心添。查實心水清嘅市民，都知道呢份預算案冇料到，鬍鬚曾再搽幾多面懵膏都係冇用架嘞。