燕之家創辦人白富鴻介紹靚燕窩就聽得多，但原來佢對冬蟲夏草都好有研究，仲介紹咗個食冬蟲夏草嘅好方法。白富鴻話，有人鍾意將冬蟲夏草磨粉沖水服用，但到藥材舖磨冬蟲夏草要睇到實一實，磨粉時又會有少量流失，所以最佳食法係喺夜晚用熱水浸泡，浸到第二朝起身飲，仲要連渣都食埋，夠晒滋補之餘，原汁原味保證無浪費。
其實冬蟲夏草食法可謂各師各法，白富鴻鍾意用熱水浸泡，但有名人反而會用冷開水浸泡，不過上述所講嘅浸水或磨粉沖水服用都係簡單製作，食得較刁鑽就好似廠商會副會長、茅台之友會秘書長吳永嘉咁，先將約十條上等冬蟲夏草用五年茅台洗淨，再加入五十年茅台浸釀，兩者混和後有助提升酒香，據聞更有養顏保青春之效。
白富鴻現為香港菁英會副主席，有傳聞話佢係下屆主席熱門人選，但佢目前只埋首積極參與會務，做好本身工作。話口未完，嚟緊三月八日將會與主席施榮忻等人到北京與博鰲亞洲論壇秘書長龍永圖會面，洽談在香港舉辦第二屆博鰲青年論壇，相信成事機會好大。
卓妮