本文重點
緣分嘅嘢真係好玄！全國青聯港區委員尋日筵開四十席搞新春團拜，揸旗嘅係兩位全國青聯副主席、「新金王」黃英豪（Kennedy）同「領呔大王」曾憲梓二仔曾智雄，青聯大家庭新舊幾代人共聚一堂，星光熠熠，卓妮都去湊熱鬧。好多「前輩級」青聯人尋晚返娘家，好似霍震宇、李宗德、許華傑咁，新一代青聯中嘅名人二代更滿場飛，當中有霍家嘅啟剛、啟山、啟文同思緯，仲有莊氏集團莊家彬同緋聞女友傅明憲、觀瀾湖朱鼎耀、英皇集團楊政龍及菁英會主席施榮忻。
原來喺啱啱過去嘅農曆新年，香港青聯主席陳仲尼（Rock）、遠東發展主席邱德根細仔邱達根（Duncan）、Kennedy細佬英傑同英敏、胡關李羅律師行其中一個合夥人關卓然嘅兒子Michael等名人二代，都不約而同與家人去咗日本北海道嘅滑雪勝地二世古（Niseko）滑雪。
二世古粉狀雪鬆軟幼細
二世古以powder snow（粉狀雪）聞名，啲雪好似粉末一樣咁鬆軟及幼細，廿四孝老公阿Rock孖住太太區海倫與九歲同六歲大嘅囝囝，過咗一次親子之旅。
佢同卓妮講笑話，兩個仔有教練從旁教路，學得特別快。阿Rock喺二世古滑雪無戴頭盔，返到香港睇報紙知道皇仁生喺韓國滑雪遇意外先知驚，話以後滑雪要戴頭盔。
Duncan亦同太太及兩個仔去二世古玩個夠。今次係Duncan人生第一次滑雪，佢謙稱自己喺雪地上不知所措，識滑雪嘅太太就自得其樂，三歲大仔就上小童滑雪班，未夠一歲細仔由傭人照顧，一家四口各得其樂。
Kennedy無同兩位弟弟一齊去二世古滑雪，佢話三個喺英國讀書嘅仔女可以放假返香港過新年，一家人難得喺晒香港，所以邊度都唔想去。
卓妮