公、社兩黨策動「五區公投」，本來係建制派同民主派嘅鬥爭，點知發展出另一條戰線，就係建制派同港府鬥法。工聯會要求將補選撥款由預算案剔出，獨立表決，兼炮轟港府大石壓死蟹。工聯咁㷫，冰封三尺，非一日之寒，事關泛民自演「公投」鬧劇，建制派一直想發動抵制，挫其氣燄，但係港府對封殺泛民辭職騷態度曖昧閃縮，唔肯配合共舞，早已惹怒一班以民建聯同工聯會為首嘅「主戰」建制派。

游說梁美芬放棄私人草案

消息指，梁美芬堵塞議員濫用辭職機制嘅私人條例草案已準備就緒，提交立法會主席審理後一旦獲批，尷尬就係政府，佢反對唔係，同意又變成打開議員歷史性提出私人草案嘅缺口，進退兩難。所以，港府近日不斷暗中出手，游說梁美芬主動放棄提案，好似煲呔曾上星期四喺禮賓府同專業會議作定期見面，就當場拍心口承諾修例，叫梁美芬唔使咁操勞。

本來，梁美芬嘅提案喺分組點票下通過機會好微，如果政府肯修訂，杜絕泛民日後再玩辭職補選鬧劇，梁同其他建制派都願意畀面收手。點知政府口惠而實不至，至今未提具體做法，令建制派氣結，建制派擔心，如果港府有心玩拖字訣，就算下半年開始做諮詢，亦好易拖到二○一二年，到時煲呔曾政府都年晚收爐啦，張空頭支票搵邊個兌現？所以，港府唔止未氹到梁美芬同建制派落疊，仲激嬲建制派，其中詹培忠仲要脅話要反對政改方案，可謂雙重損失。

據悉，港府對修例禁議員辭職再選議而不決，主因係內部意見分歧，一派認為，泛民浪費公帑搞騷，市民反感，大條道理修例杜絕，但係另一派則以違反普通法精神為由反對，兩邊拉鋸，爭持不下，於是搞出呢一鑊泡。