工聯會大姐大陳婉嫻喺政壇打滾多年，乜嘢風浪都見過，但原來都有弱點。話說嫻姐尋日出席一個慈善午宴，原本以為只要坐定定等開飯，冷不防發展局局長林鄭月娥上台搓湯圓，拉埋台下嘅嫻姐同勞工處處長謝凌潔貞落水，齊齊上台表演，嚇到嫻姐猛話「我唔識㗎！要教我呀！」結果嫻姐雖然搓到露晒餡，但誠意搭夠，三個人幾粒湯圓咁就為建造業關懷基金籌得廿萬善款啦。
其實今次搓湯圓真係好簡單，大會一早將芝麻餡同搓好嘅湯圓皮分成細分，只要將湯圓皮㩒扁，放舊餡入去包好再搓番圓就得，但嫻姐明顯無幾可入廚，猛話自己唔識整，惟有睇住其他人邊睇邊學，結果第一粒出品失敗收場，露出少少芝麻餡，搓第二粒先叫似番啲樣。相反謝太就明顯唔係生手，見到餡多皮少仲識拎咁啲餡先包，製成品似樣得多。
至於林鄭就話自從小朋友長大後就做咗「無飯煮婦」好多年，原先大會叫佢煮兩味就真係咪搞，趁就嚟元宵搓吓湯圓就無妨，最緊要愛心搭夠，籌到廿萬善款幫助意外身故建造業工友嘅家屬。