今年係虎年，遊戲玩法係由三位議員對三個高官，大家喺一大堆寫住單詞嘅卡紙入面，搵番有「虎」字嘅成語再掛起佢，搵到最多嘅就贏。代表議員出賽有李卓人、黃定光同譚偉豪，而官員代表就有孫公、勞福局常秘鄧國威同民政事務局局長曾德成。睇牌面當然係官員隊勝算高啲，點知最後都係輸喺議員手上，而當中嘅罪魁禍首就係孫公嘞。

鬍鬚曾（右）同李卓人講嘢講到手指指，睇嚟好唔客氣。

立法會新春午宴，官員議員同枱食飯。

「投」虎歸山 「晝」虎類犬

其實官員隊喺遊戲度一直領先，話咁快就搵咗六個成語嘅雛形，差一兩個字就可以完成。不過期間運氣就麻麻，好似佢哋想講「放虎歸山」，但就搵極都搵唔到個「放」字，點知孫公竟然求其用「投」取代「放」，畀咗個機會泛民揶揄話同「五區公投」有關。孫公錯完一次不特止，當佢想講「畫虎類犬」，誤將「晝」當成「畫」，仲要台下官員大聲提水先發覺。加上佢將「虎嘯風生」整錯做「虎嘯生風」。就係因為咁，所以官員隊輸晒！

本來新年伊始，和氣生財，不過有議員見到啱啱發表完「冇料到」預算案嘅財爺曾俊華，都忍唔住要跟進佢哋嘅訴求，例如李卓人話明如果預算案唔提跨區交通津貼，就要去搵鬍鬚曾淋紅油，尋日阿人冇帶紅油去立法會，不過佢哋兩人碰面，大家講到手指指，睇嚟都唔多客氣。

卓妮