明明是派糖又話唔係，自○八年開始就一直在錯估狀況、赤字轉盈下派糖，今年原先估計會有三百九十九億赤字，到頭來股樓齊旺加上賣地理想，於是有一百三十八億盈餘；接着佢又預測來年又有赤字，又再擺出一副「巧婦」難為「無米」之炊的姿態，跟着又話最恨「派糖」呢個詞彙，成日都要人哋讚佢係「針對性紓困」，真係笑鬼死人！

鬍鬚曾，在你的「針對性」下，老朽乃「無殼蝸牛」一族，寬免差餉從來冇份，退稅即使有六千元，仍未夠填借錢交稅的「稅」；再說，你加豪宅印花稅，啲行家話你「唔夠震撼力」，啲炒家話加十萬八萬印花稅，相對二千萬元過外的豪宅，根本就濕濕碎；遏抑樓市升勢又係廢噏。有樓之人層樓係咁升，租金係咁升，老朽租樓住又要畀多幾千元，而業主又獲寬免差餉，阿哥，你這不是在製造貧富懸殊、階級矛盾嗎？試問怎算「針對性」？

鬍鬚曾，你想洗脫「派糖」小恩小惠、軟柔無力、炒冷飯、狼來了的惡名，咁唔該攞少少魄力出來，顧及吓長遠發展，搞活香港經濟。太史公司馬遷二千多年前都識講「富商大賈周流天下，交易之物莫不通」，只要經濟蓬勃，百姓人人搵到食，市民個個安居樂業，講真，我要你粒糖做乜啊！