今年係工業總會五十周年誌慶，工總尋日為位於荔枝角嘅新總部搞咗個啟用儀式，為連串慶祝活動打響頭炮。呢個面積逾二萬呎嘅新總部，唔單止裝修富時代感，仲新增咗展覽廳同宴會廳。不過，原來工總當日決定買呢個新單位嘅時候，唔係一心諗住搬總部，純粹為咗投資。
工總主席孫啟烈尋日話，起初工總冇諗過要搬新總部，但工總放喺銀行過億嘅儲備又收唔到息，所以決定買物業投資；後來地產中介公司為佢哋覓得呢個單位，工總覺得呢度好開揚，又夠大，於是舊年八月以七千五百萬元，一筆過買起呢個新單位，將工總總部撥埋過嚟，再將位於尖沙咀漢口中心嘅總部租出去。據聞咁搬一搬，工總每個月穩袋十七萬租金，一年袋成二百幾萬。
工總今次不但搵到新總部，又有租金收，可謂一石二鳥。如果財爺有向工總學習，識得善用政府龐大嘅儲備，相信依家都唔會畀人鬧得咁甘嘞。