新界鄉議局位於沙田石門新大樓工程正在趕工，期望趕及明年舉行新春團拜，局方亦繼續傾力籌募建造費，與不斷漲價嘅建築材料競賽。過去好多商界大孖沙已慷慨科水支持，目前局方正向「漏網之魚」募捐，主席劉皇發前日就聯同副主席張學明帶領一班鄉紳前往拜訪華置董事劉鳴煒。
發叔同學明分別向劉鳴煒介紹鄉議局嘅角色及工作，大家交流氣氛相當融洽，據聞劉鳴煒相約發叔稍後再會面，洽談贊助新大樓建造費問題，相信好大機會成事。其實鄉議局籌款成功與否都係隨緣，但班鄉紳對劉鳴煒觀感好好，大讚佢一表人才。鳴煒喺富豪二代之中，向以踏實、成熟和節儉見稱，難怪班鄉紳有此觀感。
最近盛傳鄉議局因新大樓工程費超支，可能要變賣九龍塘局址。鄉議局消息話，雖然工程費超支，但只差幾千萬元就到位，未至於要出售物業，話晒九龍塘現址對鄉議局好有象徵意義。