本文重點
一年一度嘅財政預算案，對本港未來一年發展影響深遠，本應係高潮所在，可惜鬍鬚曾一如以往冇料到，預算案提出嘅建議被批少修少補，紓困措施炒冷飯，長遠扶貧政策交白卷，但卻比以往預算案為長，認真又長又悶。約近兩個鐘嘅演講中，除咗講到煙草稅時令一眾高官同議員醒一醒之外，其餘時間佢哋都不敵鬍鬚曾嘅催眠功，唔係自己做自己嘢，就係長期處於魂遊狀態，當鬍鬚曾冇到。
高官中瞓得最勁嘅，莫過於瞓到蜷埋一舊嘅教育局局長孫明揚。不過一眾行會成員都唔執輸，夏佳理同梁智鴻都收到周公嘅奪命追魂call，梁智鴻瞓到幾乎跣低。
上網玩電話 睇書刨剪報
不過，亦有一班預咗預算案冇料到嘅議員，早已準備好點樣喺漫長嘅兩小時解悶。民主黨甘乃威同衞生服務界嘅李國麟事前影咗一大疊政改剪報入去刨，自由黨張宇人同經濟動力梁君彥就一味喺度玩電話，張文光就掛住上網 check email，總之齊齊當財爺透明。
不過最當財爺透明人嘅，一定非白鴿黨鄭家富莫屬。事關鄭家富拎住本《上海一九四九》睇足個幾鐘，事後仲振振有辭話預咗財爺冇咩新嘢講，一路睇書一路聽佢講都唔會走雞喎。