呢個特區政府真係乜都會發生！眾所周知，預算案涉及好多敏感財金政策同數據，屬機密文件，必須小心處理，但今年竟然鬧出「洩密驚魂」。朝早九點左右，政府總部中座嘅門打開，兩部各載住二、三十疊預算案嘅手推車重甸甸咁緩緩推出，一疊疊預算案全部用雞皮紙包好，包裝紙上清楚印有「Security」警告字眼，顯示要小心運送，不容有失。

幾十本跌到一地都係

點知，當工作人員推到門口時，輕視嗰一級仔石階，平時手推車要倒後落石級，尋日卻鬼遮眼大模廝樣由前轆先落，結果「噗」一聲，其中一架車上嘅四、五疊預算案應聲落地，一直保密嘅青綠色封面設計迅即大曝光，吸引成班記者行家蜂擁而上先睹為快，惹嚟一陣起哄。當時三、四十本預算案跌到一地都係，工作人員執都執唔切，新聞官擔心預算案機密內容曝光，急急腳上前幫手，三扒兩撥合力將兩車預算案原路推番入大堂，再經停車場運走。

呢幕預算案運送甩轆事件莫非係天意，要預兆今年預算案會被人插到飛起，局面似足倒瀉籮蟹呢？如果係嘅話，鬍鬚曾都要嘆句天意難違囉。尋日預算案一公布，劣評如潮，社會狠批之聲此起彼落，鬍鬚曾要收拾殘局，佢嘅窘境肯定比嗰幾位「執書」職員難睇得多。

其實，踏入二○一○年之後，鬍鬚曾出師不利已經唔係第一次，一月初，佢計劃聯同金管局總裁陳德霖等人啟程去北京訪問，同中央政府財金官員會面，點知撞正北京十三年嚟最早嘅一場大雪，迫於航班取消，最終無奈打道回府，變成有京上不得；尋日又鬧出預算案倒瀉籮蟹事件，接二連三唔老利，睇嚟佢喺虎年都有排捱囉！