早兩日佢拎住個紅色漆皮手挽大袋去自由黨新春團拜，個袋並非舶來品，而係香港自家品牌。咩牌子？之唔係「方剛牌」囉，佢黨友方剛做成衣，旗下有幾個時裝牌子，今次莎姐用嘅係Jessica。

襯衫出trip做「士啤」

莎姐之前做主持，獲「方剛牌」贊助，自掏腰包一樣買得爽。莎姐係「方剛牌」長期熟客，佢呢位老主顧一早做咗VIP，每次幫襯都有折頭，所以買嘢一啲都唔貴，好似今次呢個袋咁，原價四位數，買到第四個仲唔使呢個價錢添！大家無睇錯，的確係四個。莎姐話原本買咗個黑色，貪佢間隔好，連A4文件放落去都唔皺，但用用吓怕佢會殘，急急買多個黑色做「士啤」。睇睇吓又覺得紅色方便大時大節襯衫，諗諗吓買埋個灰色，啱出trip用，結果就買咗四個嘞！

講講吓方剛行過，一眼認到係自家出品。大家講開折頭，方剛忍唔住幽自己一默話，如果攞佢張卡片入去買嘢，一定有特別價……特別貴價，起碼收高20個巴仙，所以奉勸大家自己做熟客仲好，折頭實惠過用佢個名嚟買。