本周一既係大年初九，亦係前全國人大常委、金利來集團主席曾憲梓七十六歲生日嘅大日子，曾家喺沙田馬會會所舉行壽宴暨新春晚宴，曾家上下、各方好友及集團員工雲集齊祝壽。今年生日對曾憲梓來說可謂意義重大，事關曾老十五年前患上急性腎炎，自此展開腎臟血液透析生涯。有調查話，捱到腎透析十五年嘅病人存活率只得百分之一，如今曾老可以與親友一齊切蛋糕慶祝生日，確係創造奇迹！
打破腎透析宿命
曾憲梓壽宴會場除咗曾家大仔曾智謀夫婦、二仔曾智雄（William）夫婦、細仔曾智明（Ricky）與太太黎瑞恩及一對孫仔孫女向曾老祝壽外，卓妮仲見到「新金王」金至尊老闆黃英豪、全國人大代表曹宏威與太太曹王敏賢、全國人大代表費斐、全國政協委員劉宇新、鄉議局主席劉皇發太太吳妹姝，以及以天價購買天滙而揚名嘅香港青聯副主席秦善文。
曾憲梓致辭時有感而發細說人生。佢憶述，九五年二月廿四日喺北京參加人大常委會期間，突然急性腎炎入院，一查之下係腎衰竭，需要即時做腎透析，自此做足十五年。曾經「死過翻生」嘅佢坦言，有調查話做過腎透析十五年嘅病人存活率得百分之一，佢啱啱過咗十五年，感到好慶幸，所以矢言一定會珍惜生命，做好唔同崗位，過好每一天！
曾老嘅一番話，令台下嘅黃英豪最為感動，讚嘆曾老堅持至今，全憑一顆堅毅不屈嘅奮鬥心和善心。佢又感謝曾老賞識，六年前邀請佢擔任金利來集團獨立非執行董事，一直對佢支持同信任。
智雄七月做爸爸
現時曾憲梓每日保持適量運動，唔單止去游水，連「乾水」（打麻雀）都游埋，一周打兩、三次麻雀，保持頭腦清醒，麻雀腳除咗太太外，仲有發嬸戥場。發嬸仲爆料，曾老今年好大手筆，一炮過攞咗十萬元做賭本，仲向麻雀腳下戰書話：「你哋有本事贏到我嘅話，即管攞去！」不過，發嬸話曾老打牌好叻，即使擺錢喺度都無本事攞喎！
多年來曾憲梓捐咗逾八億畀國家，將來佢將呢個責任交畀細仔Ricky，所以曾老命名嘅三大基金會，包括教育、載人航天及體育基金會，全部交由Ricky負責。卓妮前晚仲獲悉William七月做爸爸，目前未知係仔定女，但最開心肯定係爺爺曾憲梓啦！