已辭職嘅前立法會議員陳淑莊（Tanya）已有固定男友，但原來男友得來不易，皆因Tanya嘅媽咪揀女婿仲奄尖過個女，要求男仔頭髮要企理乾淨，最搞笑係唔鍾意男人着白襪襯黑皮鞋，認為咁嘅配搭超古怪。
Tanya尋日同傳媒茶敍時講起陳媽媽，話佢對女兒一直管教甚嚴，逢親有男仔打電話去屋企都會大為緊張，而且會扮到好惡咁要求對方報上名來，但當知道電話中人係Tanya嘅老友或者冇可能發展成情侶嘅男性朋友時，就會口氣一轉，不知幾客氣，搞到Tanya哭笑不得。
陳媽媽雖然嚴管女兒嘅「交友」情況，但與此同時竟然叫Tanya要喺三十五歲前嫁一次，因為佢認為女人如果到三十幾歲都未結過婚，男人會覺得呢個女人一定有啲問題，搞到冇人敢追。依家Tanya仍然單身，不過佢有一個拍拖多年感情穩定嘅男朋友，咁算唔算聽阿媽話呢？