香港呢幾日天寒地凍，不過，點都唔及遇到一個漠視民間疾苦嘅財政司司長咁難受。「鬍鬚曾」曾俊華後日發表財政預算案，佢早前喺網誌話唔鍾意「派糖」呢個名詞，尋日更加話預算案一般都唔會提出新政策，香港有一個「想唔撈」咁款嘅財爺，真係苦、苦、苦。
鬍鬚曾話，每年預算案其實係為咗配合施政報告，作出資源調配，理念上預算案一般都唔會提出新政策喎，又話提新政策係政策局工作，財政司司長唔會越俎代庖，仲以一句豈能盡如人意自解，真係頂佢唔順。按照鬍鬚曾嘅邏輯，咪即係好多扶貧新措施都唔關佢事，咁仲有乜嘢係關佢事呢？
最令人氣頂嘅係，鬍鬚曾要做守財奴，仲要攞彩過年，話喺嚴重財赤同經濟不景氣下，仲有能力喺唔使提高稅收嘅情況下，改善現有服務，發展中長期經濟措施，實在不得不讚社會健康理性，認同審慎理財原則，即係兜個大圈讚自己。