香港嘅愛國愛港陣營近排好明顯要壯大力量，所以，民建聯要搞黨員年輕化、工聯會要開拓直選市場、香港傳統青年組織要銳意革新。至於大大小小散布社會各階層嘅社團同聯誼會，就要喺日後嘅大型選舉中，更好地發揮大後方支援角色囉。

搶閘開工 凝聚票源

羅馬非一日建成，選舉票倉亦一樣。距離二○一一年區議會選舉同一二年立法會選舉仲有好一段時日，不過，各式親中社團已經暗暗搶閘開工，設法吸票，成立會所，凝聚票源，方便數票、掘票同拉票，就係龐大選舉工程嘅芸芸新招之一，而呢一招絕對係口袋少個崩都唔得。

被寄予厚望、要喺未來立法會功能組別選舉發揮強大拉票功能嘅港區省級政協，唔止成立聯誼會，上月仲宣布喺灣仔海外信託大廈買下七千三百呎會所，斥資三千多萬元。由全國政協常委陳永棋擔旗嘅友好協進會，最近扑錘租用中環廣場約一千呎舖做會址，月租四萬幾蚊。香港福建社團聯會尋日搞春茗，喺新簇簇嘅北角新會所舉行，面積近七千呎，用咗三千三百萬元。呢款一擲千金嘅新選舉工程遊戲，民主派想唔認輸都唔得。

大小社團 一票不漏

福建社團聯會嘅舊會址喺上環，以長期租賃形式設置，突然搬入有「小福建」稱號嘅北角，相信唔止係方便同鄉咁簡單。聯會主席林樹哲話，新會址會用嚟舉辦福建文化活動，歡迎鄉友上嚟聚腳。民建聯陳克勤尋日連走八檔活動，未食晏晝都要趕嚟同班福建鄉親大佬打招呼，梗係啦，將軍澳住有十萬名福建人，港島福建人之多更加唔在講，克勤仔兩年後無論留守新界東定轉戰港島，都要靠呢個隱身商廈嘅真正福建票倉，唔嚟呢度拜票去邊度？

據聞，香港其他五湖四海嘅主要同鄉會同社團，都一樣要幫手掘票，大有大做，細有細做，總之無孔不入，一票不漏。由於建制派全面退出五區補選戰場，到底呢支建制派掘票特攻隊有幾大威力，可能最快都要等到明年區選，大家先至有機會見識到嘞。