稻香集團旗下酒樓食肆品牌有十二個咁多，全港分店加埋有成七十四間，短短幾年時間佢哋就發展成咁龐大嘅飲食集團，實有好餸介紹啦！不過稻香行政總裁梁耀進（Eric）竟然唔幫襯自家食肆喎，怪哉！
卓妮早前撞到Eric，問佢最鍾意邊間食肆，原本以為佢會推介旗下食肆，點知佢話平時唔會喺旗下食肆食嘢，一有機會就會去試下行家嘅出品！佢好老實咁推介利苑酒家，其中一道千葉豆腐最令佢折服。
Eric話利苑係行內公認嘅一流食肆，無論食材、廚藝或者服務等，整體水準都保持得好好。佢印象最深刻嘅菜式係切得極薄嘅千葉豆腐，廚師刀法極純熟，味道亦好好。卓妮見佢咁識食，問佢覺得旗下食肆有咩菜式值得推介，點知佢笑謂：「唔評論，留番客戶去評價！」Eric識英雄重英雄，不過畢竟利苑同稻香嘅客路同風格，係有啲唔同嘅。
卓妮