新世界發展非執行董事紀文鳳（Leonie）縱橫商場幾十年，收藏嘅靚錶都有十幾廿隻。上周卓妮喺蘭桂坊撞到佢，見佢戴住Patek Philippe舊款經典腕錶，Leonie話佢鍾意隻Patek Philippe唔太閃兼且夠大隻，出差唔會唔見，依家一年三百六十五日都與佢為伴添！
Leonie話佢一向好鍾意靚錶，屋企至少廿幾隻。佢特別鍾意細緻小巧嘅腕錶，但係由於成日周圍走，細錶好容易丟失，所以佢依家成日戴呢隻當年以三萬幾元買入嘅舊錶，依家升值至少一倍添！不過Leonie近年都買少咗嘢，前年四川地震後，佢頓悟咗唔少道理，有次揀中咗對耳環，都臨時決定唔買，寧願捐咗筆錢。
Leonie做善事好低調，四年前佢父親紀力勤去世，於是佢便以父母親名字成立咗個慈善基金，默默幫助窮苦人家。佢話啲靚錶靚物戴得幾多啫，自己有就夠啦！做善事開心好多。
講番工作，Leonie透露新世界有幾個項目要喺滬港上市，例如北京間合資汽車銷售公司正排隊發行A股，睇嚟內地投資已經進入收成期。
卓妮