尋日高興出席嘅有已經退下官場火線多年嘅媽打李麗娟、現役嘅有陳甘美華、尤曾家麗、積金局行政總監陳唐芷青同立法會議員劉健儀等。大部分校友都係由小學甚至幼稚園開始讀起，陳甘美華就中一先加入，不過曾經係中學部年紀最細嘅佢，開學第一日，有幸被選中上台獻花畀修女，咁特別嘅經驗，令佢至今難忘。

媽打贊助退休修女到賀

至於五姊妹都係瑪利諾校友嘅媽打就成功將民主帶入校園，話說當年佢畀修女揀咗做Head Prefect，但佢覺得咁樣唔公道，就向學校提出應該由學生互選，最後連所有學會都有自己投票權，依家講起上嚟，佢都覺得好驕傲。講到今次嘅校慶，佢就更加出心出力，除咗line up學校同大新銀行推出白金卡之外，仲有份贊助好多返咗美國退休嘅修女返港出席慶典，同時又搵咗個本地有名嘅雕刻家為學校造咗一個模型，等師妹們有更多文化接觸。

校友們對母校有情意結可以理解，但係估唔到身為家長嘅利孝和夫人同公民教育委員會主席李宗德都一樣咁有心。利夫人兩個囡囡都係瑪利諾校友，囝囝亦喺小學部畢業。身為家長嘅佢大讚學校教得好，所以佢從來唔使為小朋友學業勞氣。利夫人仲愛屋及烏，六○年仲幫跑馬地藍塘道嘅瑪利諾書院籌款添﹗

李宗德兩位千金亦喺瑪利諾就讀，大女李美辰尋日仲帶埋老公一齊嚟食飯，美辰由小學一路讀到預科，再放洋完成大學同碩士課程，依家妹妹仲喺瑪利諾讀緊中三，所以同母校嘅情誼，特別悠長。

陳曦齡同姐姐依齡、妹妹美齡三姊妹都係瑪利諾校友。	有校友話，劉健儀當年嘅氣質同幾十年後嘅佢無大分別。	身為小學部校監嘅余黎青萍為「鬼樹」搞到失聲，幸有老公余其祥細心照顧。

卓妮