好多人喺農曆新年都有密麻麻嘅節目，但係平日忙個不停嘅醫學會前會長蔡堅，今年就要喺醫院過年。佢話過年前肚痛咗兩日，年廿九情況加劇，又燒到攝氏四十度，惟有入醫院。蔡堅由有「朱大腸」之稱嘅老友朱建華主診，發現佢細菌入腸，患上急性腸炎，吊咗幾日抗生素，入院五日就瘦咗五磅。
公立醫院每逢新年會搞吓氣氛，私家醫院可能都會有類似活動，但蔡堅話，佢買咗保險住頭等房，四周圍都無人，恍如與世隔絕。新年要喺醫院過已經好唔開心，最慘就係睇唔到年初二嘅煙花，呢幾日唔係對住四幅牆，就係睇報紙同上網，其實都真係幾悶。
好彩蔡堅住嘅浸會醫院，好多喺度掛單嘅醫生如醫學會會長謝鴻興、副會長陳以誠同會董林哲玄都有去探佢。佢話，如無意外，留醫多一至兩日就可以出院。曾被稱為「潮州怒漢」嘅蔡堅以敢言見稱，多年來為醫生爭取權益，又積極為醫學界培育後輩，希望佢早日康復，身體健康。