港區人大常委范徐麗泰雖然無做立法會主席一段時間，不過依然咁忙，下星期三佢就要飛去北京，參加一連三日嘅全國人大常委會會議。不過范太尋日就同我哋講，一開完會就要急急腳趕返香港，因為要返嚟捧偶像陳寶珠場。
范太話由細到大都好鍾意睇寶珠姐嘅戲，尤其欣賞寶珠姐無論扮男定女都演得出箇中神韻。雖然范太係寶珠姐超級粉絲，不過佢實在太忙，所以即使○三年已經透過寶珠姐嘅節目真正認識咗佢，至今仍然無乜時間可以聯絡。之不過，緣分嘅嘢有時真係好難講，范太前排就喺街上撞到寶珠姐，對方提起遲啲會演出粵劇折子戲，仲親自送咗兩張飛畀范太添！
寶珠姐嘅演出由下星期三起一連演出四晚，范太只可以睇到尾場，范太收到飛後不知幾開心，計過條數後話趕一趕都要返香港捧場。咁當然啦，寶珠姐風采逼人，想買好位都唔係咁易，仲要咁難得夾到時間，難怪范太寧願做「空中飛人」啦！