光纖之父、諾貝爾物理學獎得主高錕與太太黃美芸，尋日應馬會主席陳祖澤（John）邀請，到沙田參觀全港首間為老人癡呆症患者而設嘅耆智園，期間發生咗件趣事。話說中心有間懷舊閣，布滿中式家具，當中擺放咗張紅木麻雀枱及一副麻雀，作為雀林高手嘅阿John興起即場獻技表演甩麻雀，一甩就估中係隻「九筒」，逗得在旁識打麻雀嘅高錕笑晒口。
有講法話打麻雀有助延緩老人癡呆症患者病情，既然阿John同高錕乃多年好友，大家可以考慮得閒打番十二圈切磋吓，助人自助嘛！難得高錕夫婦親身到訪支持耆智園發展，阿John向高錕夫婦送贈刻有二人名字嘅馬會筷子，高錕話，雖然自己身在外地生活，但仍習慣使用筷子，所以呢份禮物非常合用。
高錕亦禮尚往來，回贈一本中文大學高錕成就展嘅場刊畀阿John，阿John就對高錕話：「香港人以你為榮！」耆智園早喺二○○○年投入服務，為老人癡呆病患者及其家人提供適切服務及訓練，以減慢患者嘅認知能力衰退速度，紓緩佢哋家屬照顧患者嘅身心壓力。