民主阿婆陳方安生同煲呔曾喺港英時代情同姊弟，不過自從哎吔細佬上位快過佢之後，民主阿婆幾乎出席親公開場合都力數煲呔曾不是。尋日由佢做召集人嘅民間策發會開記招講政改方案，民主阿婆提起煲呔曾又再扯火，話佢早前公開表示補選未必投票形同向公務員同問責官員施壓。
民主阿婆平時已經睇煲呔曾唔順眼，依家對方仲出口術打壓佢力推嘅「五區總辭」，自然更頂唔順實行要開口寸爆。
佢諷刺煲呔曾話會就「五區總辭」依法辦事，安排補選，身為特首唔可以左右選民嘅投票意向，更加唔應該向公務員、問責官員施壓，因為投唔投票係選民個人決定，如果政府脅迫他人杯葛選舉，係違反《選舉條例》，之後仲大大聲叫煲呔曾做好榜樣，補選當日要出嚟投票。
其實民主阿婆近年踩煲呔曾踩到高踭鞋都爛幾對，對上一次就食住反高鐵個勢，狠批事件歸根究柢係政府施政出問題，煲呔曾解決唔到社會深層次問題所致，之前泰國包機事件又鬧晒成個政府，順理成章將隻鑊掟喺煲呔曾前面，總之就咬住唔放啦。