「五區公投」係建制派同民主派大戰，亦係泛民陣營內公社兩黨與民主黨嘅路線之爭，誰勝誰負，左右民主黨嘅未來興衰。所以，普選聯盟一踏入虎年，就猛虎出籠，不停出招造勢，希望力壓公社兩黨嘅氣燄，早前約見政務司司長「唐唐」唐英年，尋日再下一城，約見范太，不過，獅子開大口，要求上京同中央官員直接傾政改，變相自設超高難度動作，自己玩自己。

范太話機會微

尋日有風聲傳，北京願意同普選聯盟溝通，仲言之鑿鑿話最快三月初成事。不過，實情係一如范太所講，普選聯盟三月起程北上嘅機會微，事關三月開「兩會」，中央官員公務繁忙，睇怕難以抽空安排見面。知情人士都話，北京嘅溝通大門唔會關上，但普選聯盟要求北上見京官，叫價實在太高，唔好講三月起行太倉卒，呢個要求根本從未上過北京嘅議程，即係考慮都無考慮過，事關普選聯盟講終極普選，中央講循序漸進，雙方差距咁遠，點傾呀？

事實上，知情人士又話，普選聯盟能否上京，中央要兼顧考慮嘅方面極多，唔係有冇時間見你咁簡單，單係要顧及建制派陣營中人感受，就相當高難度。建制派政黨、商會、人大、政協同工會等一大棚人做「爛頭卒」撐政改，無功都有勞，佢哋都未獲中央官員接見鼓勵士氣，反而普選聯盟嗌兩句就有得上京，黑狗得食，如果中央真係幫普選聯盟圓上京對話夢，可能會令一班建制派人士唔高興，有損士氣，隨時影響與公社兩黨嘅對陣，影響可謂牽一髮動全身，中央又點可以唔小心行事？都仲未計普選聯盟最後會出乜嘢牌。所以照牌面睇，范太見普選聯盟，對緩和北京與泛民嘅繃緊氣氛的確有緩和作用，但普選聯盟如果寄望獲安排上京煲自己，睇怕失望居多。