19/02/2010

播放本新聞相關短片

中環出更:范駿華買周歲馬當抽獎

本文重點
身兼馬會大董嘅全國人大常委范徐麗泰與愛子范駿華(Andrew),多年前共同擁有嘅愛駒「另具一格」,已經退役一年,至今未有再買新馬。范太兩母子最近再度出擊,本月初委託中間人喺新西蘭以五十五萬港元購入一匹周歲馬,身在香港嘅范太同Andrew就喺網上睇馬辦,除咗一致覺得匹馬好合眼緣外,價錢亦符合預算。

實行刀仔鋸大樹

周歲馬即係年幼馬匹,未知表現如何,但勝在價錢平,當係買個彩數,實行「刀仔鋸大樹」;如果唔想冒風險,就要花幾百萬競投較成熟嘅靚馬嘞!不過,范太兩母子購買嗰匹新馬屬質素穩定嘅Keeper父系,應該唔差得去邊,但要先喺新西蘭當地養多一年半載才能運送到香港出賽。前日卓妮喺馬場撞到Andrew,佢話當地養馬同訓練費,計落平過香港。

不過Andrew坦言,買得周歲馬,已經預咗當係抽獎,希望抽中大獎啦!范太尋日出席活動時都話,馬名已初步諗定三個,但要等馬會審閱後先至有最後定案喎。