玩具大王蔡志明大女蔡加敏喺KCP開名牌手袋店，有自己嘅buyer到各個時裝勝地入貨，每季各個品牌有咩新貨到，佢都好快知，仲可以率先用添。加敏話從來唔怕同人撞袋，有時啲客睇到佢用嘅款靚，仲會落舖頭問，所以佢每次搵到心頭好，都會入多幾件同客人分享。好似佢早幾日拎住嘅Dolce & Gabbana羊皮patchwork手挽袋就係一例，大概賣17,200蚊。

不過喜好可以分，時間就無得傾嘞，加敏老公馬鴻銘早幾日去老友陳強個生日會嗰陣同卓妮講，老婆以前係工作狂，依家專心湊女，一星期只係返兩日工，仲計劃生多個。馬生一臉慈父樣話，牙牙學語嘅囡囡第一個識講嘅字係爸爸，好感激太太教囡囡氹自己開心。

馬場名媛「袋」價不菲

至於差唔多每個靚太都有一個嘅Hermes，馬場亦不時見到佢嘅影蹤，今次拎住嘅就係馬主史立德太太。史太一身紅色當旺「富」裝同老公入馬場，好有新年氣氛，不過史太向來低調，一講到牌子就耍手擰頭。據卓妮知道，佢呢個30吋嘅Birkin要差唔多六萬九蚊先有交易，所以貴氣想藏都藏唔住。

馬主林建康嘅太太就手拎8千零蚊LV Monogram Vernis Rosewood方形手袋，襯埋條近4千蚊嘅同牌子Globe Bag Charm飾物，即刻生色不少。立法會五散人之一陳健波都同太太現身馬場，佢太太就鍾情Classial嘅Dior Hard Core晚裝小手袋，雖然個款式比較低調，但連埋個水晶扣就顯出身價，個袋年前要賣差唔多萬五蚊，依家就絕版咁滯，睇嚟陳太都好有投資眼光。

HK$65,000+	林建康（左）一家三口齊齊入馬場，太太係LV擁躉，揹住既袋係Monogram Vernis Rosewood。	HK$8,050

卓妮