妻伴盲夫度人生高低

江榮富受母親眼疾遺傳影響，自幼雙目接近失明，只靠左眼僅剩餘的一成視力「盲摸摸」地生活。由於天生視力薄弱，連小巴及巴士號碼也看不見，進出任何地方也只能乘地鐵或走到巴士總站乘巴士。現年五十歲的他坦言，當時覺得個世界好灰，直至八○年當義工時遇見現時的妻子，他的生活才重添光彩。

由相識至拍拖，由拍拖至結婚，江榮富夫婦已一起度過了三十個年頭，江太憶述，「最初識佢時，我讀緊大學職業治療系，佢就只有中六程度，屋企人知道我哋拍拖，都畀好大壓力我，佢哋話以我嘅條件應該有更好嘅選擇，點解要同一個雙眼唔好嘅男仔一齊」。兩人拍拖七年，但期間卻因學歷懸殊、自卑心作祟等問題鬧分手最少六次。

為了愛妻，江榮富十年前建立坐擁市值七百萬元的「收藏家」扭蛋王國，但好景不常六年後終結業，江榮富曾一度想過自殺，但江太對他的不離不棄令他打消此念頭。「太太知我右眼睇唔到嘢，總會企喺我右手邊扶我；我哋鍾意睇西片，佢就喺我旁邊讀字幕畀我聽」。

江太甜絲絲說：「我欣賞佢有毅力和永不放棄嘅精神，每次分開後，都會好唔捨得佢，反而會更加珍惜呢段感情，知道要挽住佢隻手行日後的路」，她又透露，丈夫每年情人節都會自製禮物送給她，如自製由三百六十五個「我愛你」砌出的情人節卡，令她大受感動。

癌漢獲支持戰勝惡疾

此外，殘障勇士阮志雄與現任妻子黃慧英拍拖一年後，九八年發現患上骨癌，與癌魔展開長達逾十年戰鬥，曾接受五十多次電療，至○三年發現髖骨出現骨枯，其後兩年內做過六次手術，需依靠輪椅出入。阮志雄夫婦不理病魔威脅，於○○年拉埋天窗，阮太則邊工作邊日以繼夜照顧身在醫院的丈夫，阮志雄憶述，太太每天早上六時準時為他送上食物，放工還即時到醫院探望他，每日如是，「佢就好似每日畀力量我，陪我捱過呢段日子」。阮太直言，「我無想過放棄，因為愛一個人，只會同佢一齊向前行，陪佢一齊撐落去」。

癮君子戒毒回饋社會

至於昔日沉淪毒海多年的姜炳耀，高峰期試過日花六千元吸毒，及後被當時拍拖僅兩年的現任妻子揭發，一次還被撞見手持利刀企圖追斬父親，令姜太一度崩潰，她不諱言曾想過離開他，「但我咁就走咗，佢會永遠都返唔到轉頭，所以我同自己講要堅持落去，幫佢戒毒。」姜炳耀為答謝妻子的無限鼓勵，終成功戒除毒癮，現開辦裝修公司，專門聘用更新人士，回饋社會。