港鐵工程牌阻擋途人視線，構成道路陷阱。荔枝角居民吳先生反映，荔枝角長荔街一帶行車路因應港鐵隧道工程局部封閉，部分工程路牌嚴重阻礙途人視線，「啲牌遮到正一正，下下要伸個頭出去裝，萬一有車衝紅燈，想走都走唔切啦！」
不過，港鐵發言人「死撐」路牌無阻礙行人視線，並指有關臨時交通安排已事先呈交由運輸署、路政署及警務處等部門組成的工地聯絡小組審批。承建商亦已採用較矮的充水式護欄（即水馬），避免阻擋途人視線，各過路處亦設有行人過路燈，指示行人安全橫過馬路。
「咁係冇用㗎！」深水埗區議會交通及房屋事務委員會委員黃志勇批評，港鐵忽視市民過路習慣，「有燈都要望吓有冇車嚟緊先得㗎，遮住晒點睇呀？」黃稱曾接獲同類反映，促港鐵改善。