我哋尋日趁冇落雨去咗行維園年宵市場，撞到去東華攤位打氣嘅東華三院主席李三元。今年東華特登租咗攤位畀廿幾位天水圍婦女創業，專賣獨一無二嘅人手製造絲花同飾物，李主席即時花二千幾元，買咗好多五顏六色嘅絲質玫瑰花，打算送畀「情人」同埋東華三院同事。
見李主席手捧幾紮玫瑰花，當中黑玫瑰最為「矚目」；話晒新年流流，究竟送畀邊個呢？幸運兒當然係佢老婆大人。李主席話，黑玫瑰代表「一心一意」，只可以當情人節禮物送畀老婆啦！問佢老婆接唔接收到？佢笑謂：「送畀佢就已經好開心㗎啦！」
今日除夕夜，李主席會喺屋企團年，年初一就同長輩拜年，初二約咗東華人去北京道一號睇煙花。主席笑住講，佢同東華人仲親過屋企人添㗎！
