嫻姐尋日出席電台節目時，話佢多年來都致力推動東南九龍海濱計劃，點知港鐵失驚無神話要喺鑽石山起個幾層樓嘅車廠，打亂晒成個計劃。嫻姐話，由於運房局局長鄭汝樺早前太忙，所以派咗副局邱誠武同佢傾，點知邱副唔單止唔聽民意、偏幫港鐵，仲喺地區度搞分化，搞到嫻姐最後忍唔住拍枱離場，結果要Eva鄭親自出馬打圓場。事隔多時，嫻姐講起仍然滿肚怒火，仲聲言好討厭呢個人，以後都唔想見到佢添。

新年快到，嫻姐就話今年照舊，會留港出席黃大仙區嘅花車活動，仲話畀屋企人詐型，話佢「放假都不忘工作」。至於每年新年都去拉斯維加斯玩番鋪嘅金勞詹詹培忠，就嫌賭城新年太逼太多人，話今年會轉去新加坡度歲喎。