消委會刊物《選擇》月刊一九七六年創刊至今，總幹事劉燕卿（Connie）一直參與，一手湊大呢本心血結晶，消委會尋日切蛋糕慶祝《選擇》第四百期面世，佢自然最開心。想當年消委會首任總幹事對孖女麥嘉軒同麥嘉殷，小時候客串做第二期封面人物；後來有書報攤老友獻計，話雜誌點都要有明星至賣紙，於是一百一十期嘅《選擇》月刊就搵咗已故巨星張國榮拍封面照，即刻暢銷好多，自此一直搵藝人及名人做封面。
Connie話，佢哋會依主題邀請藝人拍攝，但安全套呢類敏感題材就好傷腦筋，所以八八年第一百四十二期就請嚟前家計會總幹事林貝聿嘉幫手。該期主題係「避孕套保險程度受考驗」，咁啱當時市面發現有安全套滲漏，該期《選擇》月刊一出版就非常暢銷，賣足七萬幾冊，比平時多一倍！
不過月刊係自負盈虧，咁多年嚟所有藝人、名人無收過一毫子酬勞，消委會就免費贈閱一年《選擇》以資答謝，其實消委會先至係最精明消費者！