製動畫拜年嘥公帑

煲呔曾尋日依慣例向傳媒發布新年賀辭，不過唔係真人演說，而係懶有新意咁製作咗三十秒動畫。短片中佢同太太化身麥兜故事人物，祝市民家庭和睦，不過據聞呢段片製作費高達十萬元，比起喺電台簡單講幾句貴好多，難怪連工聯會立法會議員王國興都鬧佢浪費公帑，批評佢無考慮貧苦老百姓感受，話不如將筆錢幫助有需要嘅人好過啦！

大舊石都睇煲呔曾唔順眼，提早幫佢開年。尋日大舊石拉埋前經濟發展及勞工局局長葉澍堃（Stephen）見傳媒，一提起預算案可能調高豪宅印花稅就嬲到彈起，大鬧始作俑者「雙曾」，話煲呔曾「戇居」，度呢條屎橋嘅鬍鬚曾就係「混帳」。佢又批評「雙曾」唔了解市場，話有啲中產如果想住好啲，買間大啲嘅樓已經要二千萬，若加印花稅以此為分界線，只會搵着中產嚟搞，無助遏止樓價上漲。大舊石嘲笑話，如果最後「雙曾」嘅屎橋可以發揮作用，實攞硬諾貝爾新經濟學獎喎！

中產係咪買得起二千萬嘅樓，真係見仁見智，但大舊石鬧「雙曾」鬧得咁狠，就令人大開眼界。

大舊石咁嬲，原來因為「雙曾」放風畀傳媒前，完全無問過業界意見，大舊石就好似新年流流畀人兜頭淋咗一桶冷水，點會唔激到紮紮跳喎！

不過大舊石除咗對「雙曾」有意見，就連近日因馬頭圍道塌樓而成日見報嘅發展局局長林鄭月娥都好不滿。佢話娥姐話就話會承擔責任，實質係「貓哭老鼠」，因為一切都係因為娥姐轄下嘅部門做錯嘢才導致慘劇發生，娥姐如果真係諗住承擔，就應該辭職。

大舊石又話要將希望寄託喺二○一二年嘅特首身上。曾經做過高官嘅Stephen就喺大舊石隔籬邊食嘢邊點頭，唔知係滿意食物質素，定係認同大舊石嘅講法呢？