元州邨有十幢公屋，九八年入伙的第一及第三期共五幢公屋設有蓋通道，反而○八年入伙的第二、四期公屋不設上蓋。近年邨內高空擲物個案不斷增加，居民出入時一步一驚心。葉太日前行經元智樓正門，有拐杖飛墮身旁，差數吋便「中頭獎」，「真係嚇死！呢度成日有人掟嘢，分分鐘中招，點解早入伙嗰幾幢就有蓋（通道），我哋新入伙就冇？」元泰樓居民林太亦對房署僅加派巡邏隊及天眼打擊擲物狂表示質疑，「呢度成日有高空擲物，試過有煙頭吹入屋，隻天眼係咪乜都睇得清楚先？」

邨民促加建 房署懶理

當區區議員覃德誠直言，元州邨過去半年發生六十多宗高空擲物個案，平均每月有逾十宗，為區內之冠，居民曾要求加設有蓋通道，惜未獲回應，「高空擲物分分鐘攞人命！房署淨係話會考慮，跟住又冇咗下文！」覃又指邨內之盲人引路徑設於簷篷以外，令視障人士成「中招」高危一族，「無障礙通道都要安全㗎，點解新屋邨嘅設計都咁差！」

高空擲物不但「攞人命」，更引發衞生問題。居於石硤尾邨的鄧先生便長期受簷篷堆積的垃圾困擾，「同房署投訴，佢話丟嘢嗰個有精神病，冇辦法喎！」而黃大仙東頭邨茂東樓居民阿斌（化名）亦同樣飽受高空擲物滋擾，希望房署正視問題。

張女士：「呢度成日有人掟啲食物殘渣落嚟，真係好唔衞生！政府要立例重罰啲擲物狂至得！」

郭小姐：「依家係乜年代呀，有蓋通道已經係基本設施，點可以慢吞吞唔即刻加？傷咗人先加就遲啦！」

盲人引路徑罔顧安全

「新屋邨點解會冇有蓋通道，盲人引路徑又喺騎樓外面，設計好有問題！」公屋聯會主席王坤狠斥房署罔顧居民安全，指高空擲物倘釀傷亡，房署難辭其咎。房署發言人以防止標籤效應為由拒絕比較屋邨高空擲物情況，僅稱特別任務隊去年十二月至今年一月十次於上述屋邨執勤。至於要求加設有蓋通道，發言人無正面回應，只解釋盲人引路徑須避開地面水管及斜台未能設於簷篷下。

■記者吳琰玲