大輝話做咗議員年幾，愈做愈過癮，今年立定決心將自己嘅工作重心放喺政治工作上。其實呢個轉變好大，畢竟做咗生意廿幾年，但大輝話想花多啲時間服務社會。其實外界一直盛傳佢鋪路入官場，佢就話到遲啲時機成熟，或者考慮轉做直選議員；至於會唔會做官，佢就笑笑口唔肯講嘞。

佢又慨嘆依家貧富懸殊問題愈嚟愈嚴重，指歸根究柢係扶貧滅貧政策無乜連貫性，認為下幾屆政府要認真處理呢個問題；點知問到佢好友兼下屆疑似特首候選人唐英年有乜扶貧對策時，佢轉移話題無再講落去。講到建制派杯葛五區總辭後嘅補選，大輝預見到時投票率會低、社會又無乜討論，變成「無票房嘅悲劇」，但佢話未決定會唔會去投票。