新一個立法會年度開始，麻煩事接踵而來，金融海嘯、雷曼爆煲、高鐵撥款同政改諮詢等，單單杰躂躂，將一眾立法會議員嘅壓力指數推至高峰。立法會秘書處有見及此，安排著名精神科醫生葉恩明教吓申訴部職員同議員助理點樣處理壓力，等大家可以管理好自己嘅情緒，不過連議員都話需要輔導。
李慧琼（Starry）係議會新丁，喺議會時間唔長，但佢尋日都呻話，入咗立法會後，未有時間適應自己議員嘅身份，就遇着雷曼爆煲，要加入調查小組幫手；高鐵撥款同馬頭圍道冧樓事件都燒到佢選區大角咀，搞到佢瞓唔安食唔落，好大壓力咁話，連白頭髮都多咗，自己都想聽吓精神科醫生有咩高見，等佢學吓點樣管理好壓力同情緒。
怪醫梁家騮心水清，話議員有醫療津貼，但為保私隱，有事都係自己搵精神科醫生穩陣啲。怪醫講笑話，教議員紓壓嗰位醫生分分鐘仲大壓力，事關議員出名問問題刁鑽，一旦當主講醫生好似官咁審，咁就大鑊喇。民協馮檢基話做議員多年，已練就不敗之身，搵佢教大家點紓壓仲好過搵精神科醫生喎。