本文重點
早前禮賓府家務員肥仔帶咗班「八十後」親朋戚友玩轉煲呔曾屋企，喺煲呔曾後花園ＢＢＱ，又擅闖禮賓府禁地，仲影埋「罪證」放上社交網站facebook。事件被揭發後特首辦一直話調查緊，計落條數玩轉禮賓府事件都爆咗煲差唔多三星期，尋日我哋追問特首辦調查進度，點知發言人話調查仲「嚴肅公正地進行」，當局會適當處理，而肥仔就仲放緊假。照咁睇，呢單嘢分分鐘要責過年先決定到點發落肥仔，莫非煲呔曾想放過佢嘅愛將？
其實件事都好明朗化，唔少熟悉禮賓府架步嘅人都開腔話班「八十後」的確入咗啲冇開放嘅地方，既然事實擺在眼前，實在唔明特首辦點解要查咁耐。知情人士就話，可能係煲呔曾太錫肥仔，諗住從輕發落就算，不過見件事炒到㷫合合，諗住等肥仔放多陣長假先再返工，到完咗煲呔曾嘅任期先唔同佢續約喎。到底當局係咪諗住唔聲唔聲等件事丟淡咗就算數，真係要問番煲呔曾先知嘞！
網民指不處分誓不罷休
不過煲呔曾可以當自己失憶唔記得，但唔可以當一眾網民陪佢一齊失智，事關facebook一早有人發起咗「禮賓府燒烤團」，話每人畀三十蚊就可以入去ＢＢＱ，已經有一千三百幾個網民加入咗，唔少網民狂轟特首辦依家擺明想將件事不了了之，堅持要睇到肥仔被處分先肯罷休，睇嚟煲呔曾今次想側側膊過骨都無咁容易！
講開又講，大家都知今次主角肥仔係煲呔曾嘅寵兒，不過一直諗唔明點解煲呔曾咁錫佢。原來據聞兩個人有唔少共同嗜好，知情人士話肥仔嘅電腦IT同攝影技術都唔錯，煲呔曾有時仲會請教佢IT有關問題。傳聞肥仔又喺禮賓府帶頭用iPhone，掀起一股iPhone熱，最後連煲呔曾都一齊用。煲呔曾一向被批用人惟親，睇嚟肥仔都可以印印腳做埋煲呔曾嘅餘下任期嘞！