東區區議會主席丁毓珠一向交遊廣闊，有好嘢一定會同好朋友分享，最近佢啲老友們又收到佢送嘅八珍芋頭糕啦！原來佢幫襯咗老字號八珍已經十幾年，勁鍾意八珍食品嘅芋頭糕夠香濃、材料又多，食極都唔厭添！
珠姐話，佢都好鍾意八珍嘅蘿蔔糕同埋其他糕點小食，但芋頭糕喺佢心目中永遠係第一名，佢每年都要訂廿幾底送畀朋友知己。
八珍食品已經係七十幾年嘅老牌子，好多香港人一出世就會聞到佢哋嘅甜醋香味。財經事務及庫務局政治助理伍潔鏇，正係創辦八珍甜醋嘅伍偉森家族第三代傳人。
八珍依家喺香港有四間舖頭，卓妮去過旺角道分店，見到排隊人龍逼到水洩不通。分店經理莫小姐話畀卓妮聽，佢哋嘅芋頭糕係選用廣西正宗荔蒲芋頭，入邊材料都好豐富，有臘味、蝦米、厚身冬菇同埋金華火腿粒，食落又甘香又夠粉。年近歲晚，淨係旺角舖頭，就日售超過一千底芋頭糕、蘿蔔糕同埋各式年糕。至於價錢就分兩種，一斤四両重嘅賣七十八元，兩斤四両重賣一百四十二元，都算抵食。
卓妮